Enumeration Form-ko somoi gita submit ka·gijagiparangkode Draft Electoral Roll-o segatjawa: CEO

SHILLONG: Meghalaya a·doko electoral roll-rangko Special Intensive Revision (SIR) ka·anio, enumeration form-rangko July 29 tarikni gisepon submit ka·na ba on·na gita somoiko donmanahani gimin somoi gita enumeration form-rangko on·gijagipa manderangni bimingrangkode re·baenggipa August-ni 5 tariko chapa ka·na sienggipa Draft Electoral Roll-o segatjawa ine a·dokni Chief Electoral Officer (CEO) Dr BDR Tiwari, Mongolbar salo u·iataha.
CEO-ni u·iatani gitade, enumeration form-rangko July 29 tarikni gisepon an·tangtangni booth level officer (BLO)-rangna on·na man·gen ba ECINET App aro https://voters.eci.gov.in website gita submit ka·na man·gen.
“A·doko niam gita pu·onna man·gipa mande sakantikon BLO-rang baksa bakrimchina chinga mol·molatenga aro an·tangtangni bimingrangko Draft Electoral Roll-rango segatna somoi gita an·tangtangni enumeration form-rangko on·china didiatenga,” ine Dr Tiwari aganaha.
A·dokni CEO, July-ni 21 tariko, dingtang dingtang political party-ni dilgiparangkoba grongaha aro SIR dakanio dakchakanirangko on·na gita sak 892 Booth Level Agent (BLA)-rangko songe on·ahani gimin mittelpilangaha.
Indake ong·engon, July 21 tarikona kingking Meghalaya a·dok gimiko king 23,06,585 enumeration form-rangko sualna man·e, enumeration form-rangko sualani 98.17 percent gapaha ineba CEO parakataha.
July 21 tarikona kingking a·doko enumeration form-rangko digitize ka·ani 14,07,446 ong·e, 62.15 percent ong·skaaha ineba ua aganaha.
Da·o dipet West Jaintia Hills, South West Khasi Hills aro South West Garo Hills a·jarangde enumeration form-rangko sualani 100 percent ong·aha ineba CEO parakataha.
Meghalaya a·doko sak 53,908 voter-rang-kode, noko dongja, gipin biapona apjitanga, siaha aro biap damgni damgittamo biming donggiparang ine ma·sina man·aha.
“Sak 53,908-oni sak 5795-de noko donggijagiparang, sak 13,379-de gipin biapona apjitanggiparang, sak 32,382-de sigiminrang, sak 2,029-de biap damgni damgittamo biming donggiparang aro sak 323-de Enumeration Form-rangko ra·chakna jechakgiparang ong·a,” ine CEO parakataha.
Je manderangan, enumeration form-rangko ra·na jechakahachim, ia manderangkode Registration of Electors Rules 1960-o pangchake ja·kurangko de·gen ineba CEO parakataha.