Shillong-o Guest House-ko rikani bidingo GHADC MDC-ni talataniko NGCO jegala

TURA: Shillong-o gong kror 8.3-na batgipa Garo Hills Autonomous District Council (GHADC)-ni guest house-ko matchote rikjani gimin Kharkutta-ni MDC aro Executive Membor (EM) Cherak W Momin-ni talataniko Bristibar salo, Niksamso Garo Community Organisation (NGCO) jegalataha.
NGCO-ni parakatani gitade, Shillong-o GHADC-ni guest house-ko matchotchipjani gimin aro NEC-ni project-rangko sandirokchengani ja·mansa iani bidingo badi ka·aha.
“Chingni kakketko am·sandie man·ani gitade, MDC Cherak W Momin aro GHADC-ni gitcham CEM Albinush R Marak-ni talatanio namen dingtanggrikaniko nikna man·a,” ine NGCO parakataha.
Iani bidingo talataniko on·angkuengon, Shillong-o GHADC-ni guest house-ko rika matchotchipjani gimin  2024 aro 2025 bilsioba uamang, gitcham CEM Albinush Marak-ko gronge agangrikaha ine NGCO parakataha.
“Chinga iani bidingo gitcham CEM-na badi ka·eba sedoaha. Chingni uko (Albinush) gronge agangrikon, ia guest house-ko rikna kamko man·gipa contractor Sitaram Bagree, iani bidingo agangrikna okamatoba re·bajaha ine chingna aganaha. Ia project-na NEC-ni chamatgipa gong kror 8.95-oni kror 1.39-kode contractor-ni account-o chipataha ineba gitcham CEM chingna aganaha,” ine NGCO-ni president Tengrak Marak, talataniko on·angaha.
GHADC-ni gitcham CEM, contractor-na phone ka·ate, NOC-ko ra·china aganatahaoba ua re·bachipjaha ine janapatengon, “Contractor-ni account-o chipatgipa gong kror 1.39-ko mai dakaha, ukosa chinga ma·sina sikenga. Ia kamko ka·jagenchim ong·ode maini gimin indita tangkarangko contractor-ni account-ona chipataha? Contractor kamkon ka·chipjaha ong·ode maini gimin contractor-na tangka gamna nanga? Ia sing·anirangko chinga sing·na man·ja ong·ode sakosa chinga sing·doskabo? Contractor-ni account-o chipatgipa tangka paisani namgniko sawarang man·aha? Guest house-kon rikja ong·ode maini gimin manderangni tangkako on·na nanga?” ine NGCO sing·doataha.
Manderangni namgnina aro namroro silroroanina chamatgipa tangka paisarangko jakkalsretgenchimode uamang maming saloba jrip nie dongna man·jawa ineba NGCO mikrakataha.
“Chingna aganchakaniko nanga aro contractor-ni account-o chipatgipa gong kror 1.39 tangkako man·pilna nanga. Ia kamo sawarang jak donga, ukoba chinga sandirokenba jinmana parakgen,” ine NGCO parakataha.