2016 bilsini MRSSA-kon jakkalchina sorkariko didia
SHILLONG: Right to Information (RTI) ka·e am·sandianirangko dakon, Home Affairs Ministry aro kachariba, entry-exit point-rangko kulianio champengjaenga ine ma·sina man·aha ine Khasi Students Union (KSU) parakatenba, Meghalaya Residents Safety & Security Act (MRSSA)-ko bon·chipatna gitasa a·dok sorkari pa·sikchae dongenga ine matnangataha.
KSU-ni general secretary Reuben Najiar-ni kobor ra·timgiparangna aganani gitade, MRSSA-ko taridapani kamrang Home Affairs Ministry aro kacharion bangki dongenga ine a·dok sorkari changni chang aganahaoba, iani bidingo RTI ka·e am·sandion, uamang dingtang dakesa aganchakaniko man·skaaha.
KSU-ni parakatani gitade, 2016 bilsionin Home Affairs Ministry, MRSSA-ni bidingo maming kobor dongkujaenga ine RTI ka·e sing·sandianina aganchakaniko on·aha.
Apsan daken, Meghalaya High Court-o matchotgijagipa case dongkuenga ine sorkarini a·kangenggipa case-koba sorkari bon·ataha aro da·o MRSSA-ni ning·o facilitation centre-rangko kulina maming champenganirang dongjaha ine Najiar parakataha.
2016 bilsio pass ka·gipa MRSSA-ko gelna miksongesa a·dok sorkari, 2019 bilsio taridapgipa Act-ko jakkalskana tik ka·aha ineba KSU matnangataha.
2019 bilsio taridapgipa MRSSA-ko da·onan a·songni President soi ka·kujaengani a·sel ra·gatna man·chipkujaenga ine Najiar aganaha.
2016 bilsini MRSSA-on, Umling-o facilitation centre-ko songna aro dingtang dingtang biaprango check gate-rangko songna bilko on·ahachim ineba KSU-ni general secretary aganaha.
Assam aro West Bengal a·dokrango niam gri songdong a·chaenggipa manderangko a·rikgalengahani gimin Meghalaya a·doko niam gri napsrukbagiparang batskaengaha ine janapatengon, 2016 bilsio pass ka·gipa MRSSA-ko a·dok sorkari jakkalchipjahani a·selsa, a·dokni simarang gita niam gri napsrukbagiparangko nirok sandina aro champengna man·jaenga ine Najiar aganaha.
Sorkarini a·kangenggipa adita niamrang, manderangko dilsretenga ine janapatengon, 2016 bilsini MRSSA-ko jakkalpilchina gita KSU, Dorbar Shnong-rang aro dingtang dingtang dolrang baksa dabina a·bachengatgnok ine Najiar parakataha.
MRSSA-ko ra·gatchina dabiengoba ian Inner Line Permit (ILP)-ni pal dabianide ong·jaenga ineba KSU parakataha.
ILP-chisa, a·dokona re·baenggipa aro re·ongkatangenggipa manderangkode nambate nirokna man·gen ine janapatengon, MRSSA-kode ILP-ni pal jakkalna man·jawa ine KSU-ni general secretary parakataha.
