SHILLONG: A·doko bilsi 18-45 ong·gipa manderangko Covid tika su·na gita A·dok Sorkari tikarangko bregen.
“Chinga ma·sia je, Serum Institute of India (SII), Covishield vaccine-ni damko pong prako Tg. 400 kae a·dok sorkarirangna palenga. Indiba sam bijini damrangko Ma·mong Sorkari gamgenma ma a·dok sorkarirangan an·tangtangni korostangchi brena nanggenma, uko namedake talkujaenga. Chanchianirangko da·osa dakenga,” Health aro Family Welfare Minister, Alexander Laloo Hek aganaha.
Iarangni bidingo chanchirimaniko dakmanaha, a·doko nanganirang batenga ong·ode, A·dok Sorkari jedakeba sam bijirangko bregen ine chanchie donmanaha ineba Hek aganaha.
“Sam bijirangko man·bana gita A·doko Sorkari je cholrangkoba dakna nanggen. Chingni nangnikaniara, a·doko bilsi 18-45 ong·gipa pilakan tika su·na man·na nanga,” Health aro Family Welfare Minister aganaha.
Tika su·achisan a·dokni manderangko ia sabisioniko chel·chakani chol dongaia ineba ua aganaha.
“Jedakgipa obostaoba a·dokni manderangko chel·chakna sorkari kang·kare kamanaha, tangka gamna nangoba sorkari gamaigen,” Health Minister aganaha.
Indake ong·engon, bilsi 18 gapgiparangde jeba re·baenggipa May 1 tarikonide COVID-19 tikarangko su·na man·aignok ine Ma·mong sorkari bilko on·ataha.
