SHILLONG: Meghalaya a·dokoba COVID-19 ta·raken giprorotaiengahani gimin, ia chango giproroenggipa COVID-19, skangona bate namen bilakbata aro ta·rakbate giproroa ine talataniko on·angenba, an·tangtangko naljoke rakkina man·na gita COVID-ni tikarangko su·e ra·china Bristibar salo, a·dokni Chief Minister Conrad Sangma, a·doko songdongenggipa manderangko didiataha.
Chief Minister-ni parakatani gitade, ia chango COVID-19 bilakbate aro ta·rakbate giproroengani gimin tikarangko su·e ra·anichisan an·tangtangko naljoke rakkina man·genchim.
Da·o antigni gisepo COVID-ni tikarangko Meghalaya a·dokni dingtang dingtang biaprango su·na miksongenga aro tikarangko komibeoba bak 100-oni bak 70 ba bak 80-mangna su·na man·genchimode a·doko songdongenggipa manderangko chel·chakna man·gen ineba Chief Minister parakataha.
Da·o dipet Meghalaya a·doko lak 1-na baten COVID-ni samrangko on·na man·aha ine talatangengon, COVID-ni tikarangko su·gipa manderangoni da·o dipet maming a·sel ong·anirangko knasoa dongkuja ine Chief Minister parakataha.
“Tikako su·e ra·ani ja·manoba an·ching COVID-ko man·ani cholrangde dongaia indiba saanirang komikalgnok aro an·ching jo·ongko warachakna man·gnok,” ine Chief Minister aganaha.
An·tangtangko naljoke rakkina man·na gita ia COVID-ni tikarangko su·e ra·chinaba Chief Minister, a·doko songdongenggipa manderangko mol·molataha.