U·IATTIMGIPAONI
SHILLONG: COVID-19 sabisiko man·giparang a·doko salsabatbat bang·batrikrikengon, ia sabisi sajinmako warachakanio, Shillong songjinmani private hospital-rang, sorkarina dakchakna gita tairenga.
Private hospital-rang dingtangmancha isolation ward-rangko tarisoenba, novel coronavirus sagiparangko sana bananiko dakna gita tarisoe dongmanaha.
Kobor ra·timgipani sing·anina aganchakengon, amsoka dipete hospitalo covid sagiparangko ra·chaksona jechakjana gita mija Bristibaro tik ka·aha ine Nazareth Hospital-ni Chief Medical Officer, Dr. Gordon Rangad aganaha.
“Da·odipet chinga dam 10 mang palangrangko a·kange donenga. Indiba nanganirang batode COVID-19 ward-ko kuliatgen aro gipin sagiparangko sanram ward-rangko chipatgen,” Dr. Rangad aganaha.
Hospital-o ge·chet mang ventilator-rang donga aro coronavirus sagiparangna ge·gni ventilator bed ba tuchakani a·damkoba nie donaha. Unagre hospitalo chu·onga gitan medical oxygen-ba donga ineba Medical officer aganaha.
“Indiba hospitalo maming neng·nikani dongjawa ine agana aganna man·jawa, maina a·song gimikon medical oxygen-na da·omitingo neng·nikaniko man·enga,” Nazareth Hospital-ni Chief Medical Officer aganaha.
Unomitingo Dr. H. Gordon Robert Hospital-ni Medical specialist, Dr. Meban Kharkongor agana je uamangni hospitalo ge 30 mang a·damrangko COVID-19 sagiparangna a·kange donengaha.
Uni aganani gitade, ia ge 30 palangon ge 6 ICU palang aro ge 24 oxygen palangrang donga.
Unagre “chinga dingtang gipin ARI clinic aro Covid emergency-koba donaha,” Dr. Kharkongor aganaha.
Unigisepon nangchongmota ong·ode uamangni pilak ventilator-rangkon novel coronavirus sagiparangna jakkalgen, ua agandapaha.
Unigisepon Woodland Hospital-ba Covid sagiparangko sanna gita pilakkon tarie dongsoman·aha ine Woodland Hospital-ni Senior Medical Officer, Dr. PW Nongrum aganaha.
Unomitingo, Bethany Hospitals Nodal officer aro ku·wattimgipa Dr. Kyntiewlang Sanmiet aganaha je, uamangni hospital bil ama gitan covid sagiparangko sanna gita chu·gimik tarisoaha.