TURA: Garo Hills Autonomous District Council (GHADC) election-rango Tribal ong·gijagipa manderangni bak ra·aniko champengna Sixth Schedule-ko taridapani bidingo aro Garo Hills-ni a·kawe jolrango songdongenggiparangna dingtang district-ko dabiani bidingo Phulbari-ni NPP MLA SG Esmatur Mominin-ni agangipa kattarangko Garo National Council (GNC) aro East Garo Hills a·jani Garo Students Union (GSU) dolrang raken jegalataha.
Iani bidingo GNC dolni gita jegalatengon, Garo Hills-o songdongkamgipa gipin jatrangni parliamentary election ba assembly election-rango bak ra·anikode GNC jegalenga ong·ja indiba GHADC-ara dingtangmancha Garo Hills-o songdongenggipa Tribal-rangna aro mongsongbate A·chikrangna on·gimin gamsa ong·ani gimin district council election-rango Tribal ong·gijagipa manderangni bak ra·aniara kraani ong·chongmotja ine GNC-ni general secretary Henyshing A Sangma parakataha.
“Sixth Schedule-ni ning·o on·gimin GHADC-ara Garo Hills-o songdongenggipa Tribal-rangni a·a-chia, daka rika, ku·agana, bebera·a aro uandakgiparangko rakkina on·gimin bilsa ong·a ine Garo Hills-o songdongenggipa gipin jatrang ma·sina nanga. KHADC aro JHADC-ode gipin jatrang bakko ra·pana man·jana gita niamrangko donmanaha aro GHADC-oba apsan daken gipin jatrang bakko ra·na man·jana gita ta·raken niamko tarina nanga,” ine GNC-ni general secretary parakataha.
West Garo Hills a·jani a·kawe jolrango songdongenggiparangna dingtang district-ko dabienggipani bidingo janapatengon, ia jolrango chengonin dingtang dingtang jatrang, ku·mong nangrime janggi tangbaengahani gimin ia jolrango songdongenggiparangna dingtang district-ko bikotna nangani katta dongja ine GNC parakataha.
Apsan daken, Garo Hills-ni a·kawe jolo songdongenggiparangna dingtang district dabianiko GSU East Zone-ni gitaba raken jegalataha aro ia jolo songdongenggiparangna dingtang district-ko kulie on·genchimode gipin biaprangoni niam gri napbaenggiparangnasa biapko on·ani gita ong·gen ine parakataha.
“Garo Hills-ni a·ako Tribal ong·gijagipa manderangna on·aniko chinga Garo Hills-ni dingtang dingtang dolrang baksa raken jegalangkugen. Bangladesh aro gipin biaprangoni niam gri Garo Hills-ona napdrabaaniko champengna gita sorkari, checkpoint-rangkoba songna nangenga,” ine GSU-EZ-ni president Saljrang Tengrik R Marak parakataha.