SHILLONG: Je chatro chatrirangan COVID positive ba high risk contact ong·e SSLC aro HSSLC porikkarangko serikna gita man·jahachim, uamangna porikka ong·attaiani bidingo Meghalaya Board of School Education (MBoSE) da·o dipet chanchia dongkuja.
‘‘Chingni da·omitingni nisande uan, dongspa HSSLC aro SSLC-ni subject-rangko maikae name matchotatna man·gen ukosan chanchiengkua. Pilak obostarangko nigrikani ja·mano, porikka ong·attaiani giminde chanchigen’’ ine Education department-ni saksa a·gipi official Robibaro u·iataha.
Uni aganani gita, da·o dipetode sakbri sakbongasan COVID-19 sagiparangni high risk contact ong·giparang dongaia.
Sing·anirangna aganchakengon, da·omiting HSSLC aro SSLC porikkarangko seenggipa chatro chatrirangni gisepode covid positive ong·gipade dongkuja ineba official aganaha. Indakoba porikka a·bachengna skang positive man·gipa chatro chatrirangde bang·a bang·ja donga ineba a·gipi official agandapaha.
