SHILLONG: A·doko, mongsongbate Shillongo COVID-19 sabisiko man·giparang jelbarikrikengani gimin nangchongmotgipa dokkanrangna agrede pilak dokkanrangkon da·aloni dipet chipattokenga. Indake unaskangonin, Pharmacy-rangna agrede Robibaro salantian pilak dokkanrangkon chiptokchina gita East Khasi Hills-ni district administration ge·etaniko on·manahachim.
Indake ong·engon nangchongmotgipa dokkanrangna agrede, da·alonin re·baenggipa May 2 tarikona kingking pilak dokkanrangkon chiptokchina District Magistrate ge·etaniko on·aha.
Indake ong·engon, COVID-ni somoio lapna rikjachina gita mikrakatan baksana bosturangni damrangko seenba tape donchina arp damrangko bate ra·jachina gitaba East Khasi Hills-ni Deputy Commissioner, pilak dokkan dakgiparangna u·iataniko on·aha.
Manderang, bosturangko bon·changna kene bredamdame donna nangani dongja, songjinmao chu·onga gitan bosturang gnang, kenchakna nangani dongja aro pilak wholesale dokkanrangan district administration-ni tik ka·e on·gimin dam gitan bosturangko paltokenga ine Shillongni saksa wholesale dokkan nokgipa Paras Bothra, koborni manderangna aganaha.
Covid man·giparang jelrikrikengani gimin Shillong songjinma Covid tika su·aniko dingchikbatatenga, indake mijaloba Shillong Civil Hospital; RP Chest (TB) Hospital, Jhalupara; Goenka Hospital, Jhalupara; RR Colony, Rynjah; Ramakrishna Mission Dispensary, Laitumkhrah; Jail Road Community Hall; MUDA Complex, Police Bazar; Matri Mandir, Polo aro JN Stadium Annexe, Polo-o tika su·giparangna cholko on·aha.
Uomitingo, Ki·tap palgipa dokkanrangkode April 26, 28 aro 30 tarikrango pring 8 bajioni attam 9 bajiona palna gita East Khasi Hills District Magistrate chol on·aha.
