SHILLONG: A·songni dingtang dingtang bakrangon oxygen-ko man·a neng·nikako chagrongengon, Shillong-ni Sikh community, oxygen langar-ko songaha, jeonikon nangnikan somoio gimik community-ni manderangna oxygen-ko on·gen.
Sikh community-ni ja·ku de·ako bang·arangan de·mittelataha, maina a·dokni skotong songjinmao salantion covid sagiparangko nikna man·enga.
Shillong Gurudwara-o oxygen langar-ko songaha.
Indake The Shillong Times baksa agangrikmitingo, Dr Kamaljeet Singh Sehdavae,jean Shri Guru Singh Sabha Shillong-ni general secretary ong·a, ua indine aganaha, “a·songni bang·a a·dokrangon oxygen chu·ongjaengako nikna man·engani gimin chinga oxygen langar-ko songna chanchiaha.”
“Mikkangchi maidakgipa sal sokgen iako darangba u·isoja, da·odipetde sorkari aro private hospital-rango chu·onga gitan oxygen donga, indiba mikkangachi oxygen komiako chagronga ong·ode, chingni oxygen langar, oxygen nangnikgipa manderangna dakchakgen.”
Uandake Sehdavae, Shillong-p iandakgipa obosta sokjawa ine ka·donganiko parakataha.
Minggipin, ia service-ko gimik jatni manderangna a·bachengata ine talate, gipin NGO-rangkoba duko ga·akgiparangna dakchakna mol·molataha.
A·songni dingtang dingtang bakrango oxygen-ko man·a neng·enga, jeni a·sel bang·arangan sitokenga. Uni gimin sorkari, hospital-ona chu·onga gita oxygen-ko sokatna kam ka·enga
