A·dok sorkari railway project-na gisik nangjaenga

SHILLONG: NPP party-chi rikdilenggipa MDA sorkari, batanggimin bilsi gittamni gisepo Meghalaya a·dokona ‘railway project’-ko ra·baani bidingo chu·gimikni gitan gisik on·e kamko ka·jaenga aro railway project-ko a·bachengattaianio donchipe donenga ine koboro parakataha.
Batanggimin 2017 bilsio Tetelia- Byrnihat-ona rel ramako taribana manchigiminko Khasi Students Union (KSU) dolrang dontongatani ja·mano, da·alona kingkingba a·dok sorkari apsan project-ko a·bachengattaina gita gisik nangjaha aro uamang hala ka·enggipa NOG-rang baksaba railway project-ko ra·bataiani bidingode agan-golpogrikaba dongsrangjaha ineba koboro janapaha.
Ja·pang koboro parakani gitade NFR, Meghalaya a·dokona ia project-ni kamko a·bachengate rel ramako taribana ine changni chang Meghalaya sorkari baksa agangrikangahachim, indiba a·dok sorkari ia apsan project-ko a·bachengtaiatani bidingo gisik on·skajaha.
A·dok sorkarini kamko nirike nigenchimode, project-ni kamko a·bachengtaiatanichi sorkari hala ka·enggipa NGO-rangko gisik saatna sikjaha gita nikna man·a. Maina sorkarini gita railway project-ko a·bachengattaina miksonge NGO baksa agan-golpogrikna maming ja·ku de·anirangan dongsrangjahachim.
Indake ong·engon, Tetelia-Byrnihat project-ko Assamode ka·sinsin matchotbaengahachim, indiba Meghalaya-ni bak gita maming namdapani aro kamrangko ka·anikon nikna man·skakujaenga ineba koborna u·iataha.
Ia bilsi a·bachengachibara, a·dok sorkari Ri Bhoi district administration-na project-ni kosako re·enggipa NGO-rang aro gipin bak dongpagiparang baksa agan-golpogrikanio baditana kingking namgniko man·ahachim, uni report-rangko on·china administration-ko didiatahachim. Uni ja·manode da·ona kingkingba maming kobor dongtaikujaenga ineba ja·pangoni koborna parakataha.