Council of Chief-ni Chairperson, vaccination-na campaign ka·na dabia

SHILLONG: Grand Council of Chief-ni Chairperson John F Kharshiing, vaccination ba tika su·ani bidingo rakbate kam ka·china aganataha. “Songadam jolrangode tika su·ani dongsrangkujaenga, election campaign-ko ka·na man·ode, maina vaccination-ni giminba campaign ka·jaenga, ine sing·ataha.”
A·dok sorkari aro legislator-rangko, “election-o campaign ka·a gita maina vaccination-ni bidingo campaign ka·jaenga, election-ni somoio candidate-rang nokantiona re·roroe vote-ko am·a, indiba da·ode tika su·ani giminde mamingkon dakjaenga?” ine Council of Chief-ni chairperson sing·ataha.
“Maini gimin manderang tika su·na nanga iani gimin talate on·ako ba skie on·anirangko da·onaba saksamang MLA-kon nikkuja.”
“Community level-on da·onaba tika su·ani bidingo dingtang dingtang dake chanchianirangko ba agananiko nikna man·kuenga. Mongsongbate songadamo donggiparang, tika su·ani bidingo u·iani dongjae re·batokjaenga. Tika su·na darangkoba drana man·ja indiba awareness-ko ba u·iataniko on·na nanggen.”
“Science-o bebera·gijagiparangba donga, indiba an·ching a·gilsak gimikan science-o pangchakani gimin an·chingba apsan daken ja·rikna nanggen. Uni gimin health department, legislator aro traditional institution apsan ong·e campaign ka·na gita nanggen.”
“Governor, Chief Minister-uamangkode tika su·ako nikaha, indiba uamangni tika su·ani koborara songbad aro social media-nasan ong·aia.”
Indake ong·engon District Council-ni gitaba sorkari, songadamo donggiparangna u·iataniko gipata dongja.
“Sorkari, awareness-ko gipata ong·osa 100 percent ong·jagenoba, bang·a tika su·ani gimin u·iode ra·toknaba donga. Da·oni chasong, media, whatsapp ba uandakgipaosan koborko gipatbata, indiba gimik manderangde social media-ko jakkalgipa on·ja aro mitamrangde social media-ko jakkalani chol dongja, uni gimin District Council, campaign ka·na nanggen.’
Minggipin Chief Minister-ni MLA-rangko gronge agangrikaniko anga namnikbeaha, apsan daken gimik representative-rang baksaba agangrikako nangnikenga. Niatgenchimode Delhi-o covid samko dam bate palarangkoba nikna man·enga, aro manderang uko bretokenga. Vaccination-ara sabisiko namatsranggen ine ong·ja, indiba sabisiko champenga gitasa ong·a, uni gimin gimikkon tika su·china mol·molatenga, ine Kharshiing aganaha.
Uandake social media-o bang·a message ba video-rangko nikna man·enga jean manderangko kenata, uni gimin social media-o gipgipa video-rangko dal·e ra·nabe ineba mol·molataha.