SHILLONG: East Khasi Hills district-o covid sabisiko champenganio chu·sokna amjaengani gimin a·dok sorkari, May jani 17 tarikonan lockdown ka·angkuna tik ka·aha.
Sonibar salo sak 375 gital covid sagiparangko man·dapa baksana batanggimin konta 24 somoini gisepon East Khasi Hills District damsaon sak 11 covid sagiparang siani gimin sorkari, lockdown ka·angkuna tik ka·aha.
“A·doko obosta namjabeenga aro covid saa man·dapaniko komiatna jotton ka·omangba chu·sokjaenga, uni gimin a·dokni manderang pilakkon an·tangtangna simsake dongchina mol·molata,” ine Deputy Chief Minister Prestone Tynsong, Sonibar salo meeting tom·a matchote kobor ra·timgiparangna u·iataha.
Indake ong·engon May jani 1 tariko a·dok sorkari, East Khasi Hills-o containment measure-ko ra·gataha, uni ja·man joljol May 5 tarikoni lockdown ka·ataha.
Uandake sorkari, changsatai, May jani 11 aro 12 tarikona ra·doatgipa Class XII exam-ko ra·doattaina tik ka·aha.
Lockdown-ni somoio bank aro post office-ko bang·gija employee-chi chalaina aganataha.
Home delivery service-ko on·angkugen aro construction worker-rang jemangan kam ka·gipa biapon donge kam ka·enga, uamang kamko ka·na gita man·gen.
“Site-o donge kam ka·giparang, kam ka·gipa biaponi ong·katna man·jawa aro employee ba kam ka·giparangna DC, ge·etaniko on·gen,” ineba Tynsong aganaha.
Iarangna agreba essential commodity ba nangchongmotgipa bostuni dokanrang kuliaigen indiba SOP-ko ja·rikna nanggen.
Unbaksana Sonibar aro Robibar salo lockdown dongkuaigen. Sukrobar atam 5 bajioni Sombar pring 5 bajiona lockdown donggen.
Aro sorkari, MGNREGA-ni ning·o sal 100-na kam ka·gipako aro ge·a-gamanio maming champengani dongjawa, indiba SOP-ko ja·rikna nanggen.
Minggipin Sonibar salo Meghalaya-o sak 375 covid sagiparangko man·dapaha aro sak 11 manderang siaha. Sak 122 covid sagiparang nampilaha.
A·doko covid sae dongenggiparang sak 2678-ona gadoangaha. East Khasi Hills-ona sak 1583 donga.
