Umling napram cholgugao tik ong·e covid test ka·gnok: Dy CM

SHILLONG: Meghalaya sorkarini re·anggipa bilsi December jaoni, a·dokona gipinchini niam gri napdrabagiparangko nirikkie ra·na gita a·bachengatgipa Umling napram cholgugao da·ororo covid sabisiko nirikkie aro porikka ra·e niani cholguga dakeba jakkaljolskaengon, tangka gong 200 gamjokode manderangko porikka ra·anio negative ong·ataijok ine manderangni matnanganiara kakketan ong·achim, indiba da·o mikkangchi uandake tik ong·gijagipa obostarang dongskajawaha ine parakataha.
A·dokona napbagiparang an·tangtangko Umling cholgugao covid-na porikka ra·anio negative report-rangko man·a gong 200-san gamna nangaia ine ong·chongmotgipa obostarangni bidingo manderangni matnanganiko sorkari ma·siachima ine sing·on, gipa obostarangko social media-rango giproroatengon, Deputy Chief Minister Prestone Tynsong, “Oe beben iandakgipa obostako chagrongengani bidingo manderangni matanganirangko chinga skanggipa salonin ma·siachim. Unigimin iandakgipa tik ong·gijagipa kamrangko bon·atna gita chinga da·ode RAT porikkako ra·gija, RTPCR-chi porikka ra·e niskana manderangni sample-rangko joljol lab-ona watatskaengjok,” ine aganchakaha.
Umling napram cholgugao indakgipa tik ong·gijanni kamrangko ka·anichi, a·dok sorkarina namgijagipa bimingko ra·baaani gimin, sorkari iani bidingo nigrike kamrangko ka·angskaenga aro mikkangchi uandakgipa obostarang ong·jana gita sorkari, cholgugao sabisina porikka ra·e niani bidingo dingtanggipa cholko dakna a·bachengatskaaha ineba Tynsong parakaha.
Ri Bhoi district-o donggipa Umling-ni napram cholgugako, a·dokona niam gri gipinchini napdrabagiparangko nirikkie ra·na gitasa kamko a·bachengatahachim, indiba re·anggipa bilsionin a·doko covid man·gipa jelbatrikrikna kenchakanio, gipinchini napbagiparangko sabisina porikka ra·ani cholguga dakeba jakkalskaenga.
Napram cholgugao iandake tik ong·gijagipa kamrangko ka·anichi gipinchini re·bagiparang altuen songjinmaona napbana man·enga, aro iandakgipa obbostarangni a·selsa a·doko covid man·aniba salsabatbat bang·batrikrikenganiko nikna man·enga ine manderangni matnangtokako nikna man·aha.
Indake ong·engon, Ri Bhoi District Administration, ia napram cholgugao nirikkie ra·anio gari-gurarangko aro napbaenggipa manderangko namedaken nirikkie ra·na gita dakchakangskaenga ineba koborna parakataha.