SHILLONG: Meghalaya a·doko aro mongsongbate a·dokni skotong Shillong songjinmao COVID-19-ko man·giparang komijaengani gimin dingtang dingtang hospital-rangko Covid hospital dakskana gita a·dok sorkari cholrangko nienga.
Meghalaya a·doko aro mongsongbate Shillong songjinmao salantian COVID-19-ko man·giparang batrorobaengahani a·sel bang·bata hospital-rangon da·o sagiparang gapna a·bachengengahani gimin sorkari dingtang cholrangko sandina a·bachengskaengaha.
Robibar salo a·dokni Health Minister AL Hek, obostarangko nina gita Shillong songjinmani Nazareth Hospital-ona re·angaha.
“Hospital-o kam ka·giparangna ka·dongataniko on·na aro pilak nanga dakchakanirangko on·na gita ku·rachakaniko on·na chinga Nazareth Hospital-ona re·angaha,” ine Hek parakataha.
Nazareth Hospital-ona re·angani somoio Health Minister, ia hospital-o oxygen-rang bon·changjawa ine ku·rachakaniko on·baaha.
Shillong songjinmani hospital-rango sagiparang gapengaha ine janapatengon, IIM Shillong-koba ge 300 palangrangchi tarisoengaha ine Hek parakataha.
Health Minister-ni parakatani gitade, IIM Shillong-na agreba sorkari, Umsawli-o donggipa TB Hospital aro New Shillong Township-o donggipa NIFT-oba COVID man·giparangko sanchakna gita tarisoengaha.
Indake ong·engon, a·doko COVID man·giparangko sanchakna gita an·tangtangni skulrangko aro community hall-rangko on·e sorkari baksa bakrimchina gita sorkari, dingtang dingtang toromni dolrangko didiataha ine Hek parakataha.
