SHILLONG: Meghalaya a·doko salsabatbat COVID-19-ko man·giparang batrorobaengahani gimin an·tangtangko naljoke rakkina man·na gita mask-rangko nambate ganchina NEIGRIHMS-ni director Dr P Bhattacharya, manderangko didiataha.
Manderangko saksa sakgipinoni chel·tanggrike aro jakrangko rongtaljringchina didiatan baksana manderangni mask gananirangko nambate nirok sandichina gita Dr Bhattarcharya, a·dok sorkarikoba didiataha.
Meghalaya a·doko aro mongsongbate East Khasi Hills a·jao COVID-19 man·giparang bilongbatroroengahani gimin an·tangni suk ong·gijaniko parakatengon, manderang mask-rangko ganna gisiko nanggenchimode aro manderangni mask gananiko nambate nirok sandigenchimode COVID man·giparangoniko bak 10-oni baksakode komiatna man·genchim ine NEIGRIHMS-ni Director parakataha.
Re·anggipa bilsio gita bilake ong·gija lockdown-rangko ra·gatan baksana champengatanirangkode dakna nangenga ine janapatengon, “An·ching manderangni mask gangija re·ruraanirangko nikna man·enga indiba mask gangijagiparangko administration maming dakjaenga,” ine Dr Bhattacharya parakataha.
Dr Bhattacharya-ni aganani gitade, bang·bata biaprangon mask gananirangko name nirokanirang dongjaenga aro songadam nokadamrangode bang·bata manderangan mask-rangko gantokjaengani gimin obostarang namjabatenga.
Manderangni mask gananiko bilakbate nirokchina sorkariko didiangengon, “Kangal ong·ana mask-ko ganjaenga ong·oba uko adita kontarangna pattoko donatna nanga indiba gipinrangni janggina kenchakaniko ra·bana on·na nangja,” ine NEIGRIHMS-ni Director parakataha.
Robibar salsamangmangon a·doko sak 418 manderang COVID-19-ko man·dapahani gimin manderangko mikrakbatchina aro mask-rangko ganjringchina Dr Bhattacharya didiataha.
Robibar salo sak 418 manderang COVID-19-ko man·dapahani gimin da·o a·dok gimiko COVID-19-ko man·e dongenggiparang gimik sak 2899 gapengaha aro da·o dipet gimik sak 228 manderang COVID-ni a·sel siangahachim.