SWGH a·jao night curfew-ko May 17 tarikona ra·dodapata

TURA: Meghalaya a·doko aro Garo Hills-oba COVID-19 ta·raken giproroengahani gimin sabisini giproroaniko champengna gita South West Garo Hills a·jaoba night curfew ba walni curfew-ko re·baenggipa May 17 tarikona ra·dodapataha.
South West Garo Hills a·jani Deputy Commissioner Ch Ramakrishna-ni u·iatani gitade, da·o dipet South West Garo Hills a·ja gimikon skul-college-rangko aro olakkiram nokrangko chipe donangkugen aro jinma tom·bimonganirangkoba ong·atna man·kujawa. South West Garo Hills a·jao antio changprak cha·enggipa bazar antirangkoba chipe donangkugen aro manderangko salruraenggipa auto-rickshaw, tempo aro uandakgipa garirang 50 percent-na bate mande gatna man·kujawa.
Kam nangchongmotana nokoni ong·katengon, mask-rangko ganjringchina, saksa sakgipinoni chel·grike dongchina aro rongtal an·talaniko rakkichina gitaba DC u·iataha.
Mande jinmani biaprango aro kam ka·chakram biaprango skatang stujachina aro ta·makkurangko jakkaljachina gitaba DC mikrakataniko on·angaha.
Sorkarini dongimin niamrangko pe·genchimode Epidemic Disease Act 1897-ni Section 2-ni ning·o on·gimin bilrango pangchake dongimin officer-rang, ja·kurangko de·anggen ineba DC mikrakataha.
Curfew-ni somoio police-rang, fire & emergency service, medical, MeECL, PHE, PWD, Press aro uandake nangchongmotgipa kamrangko ka·enggipa dolrangkode champengani dongjawa ine DC u·iataha.