TURA: Garo Hills Autonomous District Council (GHADC)-o kam ka·enggiparangna jabongani dormaharangko on·na gita gital executive committee (EC) ku·rachakengani gimin, kam ka·enggiparangni dabienga gita dormaharangko gital pay scale-o on·skachina Tura-ni MDC Bernard N Marak didiangaha.
Re·anggipa Sombar salo GHADC-ni chief executive membor (CEM) Benedic R Marak-ni dilanichi executive committee-ni membor-rang, GHADC-o kam ka·enggiparangko grongenba, jabongani dormaharangko on·na ku·rachake, uamangni kam ka·gija jingjengataniko dontongchina mol·molangahachim indiba GHADC-o kam ka·enggiparang, jabongani dormahako ra·na jechake komibeoba bilsisani dormahako gital pay scale-o on·china dabitokskaahachim.
Indake ong·engon, GHADC-o kam ka·enggiparangnaba Fifth Pay Commission-ni recommendation-o pangchake gital pay scale-ko 2018 bilsion NPP-chi dilanggipa executive committee ra·chakmanahachim aro ia gital pay scale-ko 2018 bilsini April jaonin a·bachengani ong·ahachim ine Tura-ni MDC parakatenba, da·o GHADC-o kam ka·enggiparangna jabongani dormahako gital pay scale-o on·skachina GHADC-ni chief executive membor Benedic Marak-ko didiataha.
Batanggimin somoirango GHADC-ko chalaigipa dilgiparangni gisik nangjahani a·sel da·o GHADC-o kam ka·enggiparang aro Garo Hills-ni manderangsa neng·nikanirangko chagrongna nangtokengaha ineba Marak, GHADC-o kam ka·enggiparangna dormahako gital pay scale-o on·china didiataha.