TURA: Rongram jolo donggipa Tura Ganol Hydel Power Project-o kamko ka·enggipa dumper truck bolsa Budbar attamchibara, Chibragre jolo donggipa a·kuangchi ga·akonange a·sel ong·aha aro ia a·sel ong·anio dumper truck gariko saltimgipa janggitangko gimaatna nangaha.
Koborko on·ani gitade, Budbar salo ia truck gariko saltimgipa, rimilbegipa ramako salangengmiting somoio uni gari maibakae a·kuangchi ga·akangaha aro ia gari a·kuangchi ga·akangenba, gariko saltimgipa Roben Basumatary bilongbee saknaanirangko man·aha.
A·sel ong·ani ja·man bakan ia mandeko Tura Civil Hospital-ona ra·angahachim indiba hospital-ona sokangon uko siaha ine doctor-rang parakataha.