TURA: COVID-19-na porikka ra·e nikujagenchimoba an·tangtangko naljoke rakkina man·na gita noktangtango nape dongchina aro noksulrangchi nape rokujachina gita West Garo Hills a·jani Deputy Commissioner Ram Singh didiataha.
Joltangtangni manderangan ia somoirango COVID-ko giproroatna man·aia ine janapatengon, manderang pilakan an·tangtangko chin gri COVID man·aha ine chanchie, da·o sal 14-na noktangtangomangba mask-rangko gane dongchina aro nokni nanga bosturangkoba nokni mande saksansa dikdiksana ong·katange koros ka·china gita Deputy Commissioner didiataha.
Mask gananiko nangchongmotgipa daito dakatengon, noktangni ong·gijagipa manderang baksa agangrikengon ba mande bang·gipa biaprangona re·angon, mask-rangko ganjringchina, jakrangko rongtalatjringchina aro sakgipinoni chel·e dongchina gita Deputy Commissioner didiataha.
Saoba gusu, fever ba uandakgipa saanirangko man·enga ong·ode bakan an·tangko dingtang donchina aro porikka ra·e nikujagenchimode an·tangni man·enggipa chinrangko 14410-ona ba sepangbatgipa health centre-ona u·iatchina Deputy Commissioner didiataha.