TURA: Garo Hills Autonomous District Council (GHADC)-o kam ka·enggiparang, an·tangtangni man·na nangkuenggipa dormaharangko man·tokkujaengani gimin kamtangtangko ka·gija jingjengattokengon, Assam a·dokoni A·chik Holistic Awakening Movement (AHAM) dolba, GHADC-ni Non-Gazetted Employees Association (NGEA)-na chakpaaniko parakataha aro GHADC-o kam ka·enggipa manderangni man·na nangkuenggipa dormaharangko on·e ia neng·nikanirangko bon·atchina GHADC-ni gital executive committee-ko didiataha.
Iani bidingo GHADC-ni chief executive membor (CEM) Benedic R Marak-na sedoatengon, uamang dingtang a·dokonisa ong·genchimoba Kamrup aro Goalpara a·jarangoniba GHADC-o kam ka·paenggiparang donga aro ia manderang an·tangtangni dormaharangko man·jae nokdangtangtangko chalaianio neng·nikanirangko chagrongna nangtokenga ine AHAM Assam state zone-ni dilgiparang parakataha.
“GHADC-o kam ka·giparang bilsi gittam ong·na sipile an·tangtangni dormaharangko man·kujaengani a·sel uamangni nokdangrang namen neng·nikanirangko chagrongna nangtokengaha. Gitcham executive committee-ni somoion NGEA baksana dingtang dingtang dolrangba uamangni dormaharangko on·china changni chang dabiahachim indiba GHADC-o kam ka·giparangni grapaniko knachakna gisiko nangjahani a·sel da·o obostarang namjabataha,” ine AHAM Assam state zone-ni vice president Raksim R Marak parakatenba, GHADC-o kam ka·giparangni man·na nangkuenggipa dormaharangko ta·raken on·china GHADC-ni CEM-ko didiataha.
Garo Customary Law (GCL)-ko ta·raken be·en pil·atchina aro GHADC-na dingtang electoral roll-ko tarichina gitaba Assam-ni AHAM dol, GHADC-ni gital executive committee-o dabiangaha.