TURA: Raksamgre civil sub-division-ni ning·o donggipa Rongsai aro Hatogaon songrango Assam a·dokoni napdrabae songdong a·chaanirangko niatchina gita Garoland State Movement Committee (GSMC) Pedaldoba regional unit-ni sedoatani ja·man, Garo Hills Autonomous District Council (GHADC)-ni deputy Chief Executive Membor Nikman Ch Marak an·tangan ua biapona re·ange, songni dilgiparang baksa iani bidingo agangrikeaha.
Raksamgre Civil Sub-Division-ni ning·o donggipa Rongsai aro Hatogaon songrangona Assam a·dokoni niam gri napdrabae nokrangko rikengani a·sel ia jolrango so·sojengjeng ong·anirangko nikna man·rongenga ine adita salrangna skang, GSMC Pedaldoba regional unit parakatenba, ia neng·nikanirangko ta·raken namatchina gita GHADC-ni deputy Chief Executive Membor Nikman Ch Marak-na sedoatahachim ine nikna man·a.
GSMC Pedaldoba regional unit-ni chairman Rimjen Ch Sangma-ni parakatani gitade, re·anggipa bilsion iani bidingo magisterial inquiry-ko dakmanahachim indiba da·onan Assam aro Garo Hills-ni gisepo simako songkujaengani a·sel Assam-oni manderang niam gri napdrabae ia jolrango songdong a·chatokkuengachim.
Iani bidingo GHADC-ni deputy CEM Nikman Marak an·tangan Sombar salo ua biapona re·ange obostarangko nieaha aro ia obostani bidingo jolni dilgiparang baksa agangrikangaha.
Indake ong·engon, Raksamgre sub-division-ni ning·o donggipa songrangona Assam a·dokoni napdrabaaniko champengsona kam ka·engani gimin GSMC Pedaldoba unit-ko Raksamgre-ni GSU Western Zone (West) dolba mittelpilangenba, ia jolrango songdongenggipa manderangni namgnina kamko ka·anio uamangba bakrimaniko on·pagen ine GSU-ni dilgiparang parakataha.
Raksamgre sub-division-o napsrukaniko champengna ja·ku de·anio GSU-ba bakrimgen
Date:
Share post:
