SHILLONG: Nongpoh Civil Hospital-o kulina sienggipa Oxygen generation plant-ko Bristibar salo Meghalaya a·dokni Chief Minister Conrad K Sangma nieaha.
Ia Oxygen plant-ko kulina gita United Nations Development Program (UNDP)-ni ning·o tangka paisarangko chame on·aha aro ia Oxygen plant-ko a·bachengatahaode komibeoba ge 25 palangrangna oxygen-ko chu·onga gita on·na man·gnok.
Nongpoh Civil Hospital-ona re·angani ja·man kobor ra·timgipa manderang baksa agangrikengon, ia oxygen plant-ko ta·rake rikchina contractor-rangna ge·etaniko on·manaha aro ia oxygen plant-ko mikkang antiode matchotnaba dongaha ine Chief Minister parakataha.
Ia oxygen plant-ko nina re·angani somoio a·dokni Chief Minister, Ri Bhoi a·jao COVID man·enggiparangni bidingo aro COVID-ko warachakna kam ka·anirangko ma·sie ra·na gita dingtangmancha Ri Bhoi a·jani dingtang dingtang official-rang baksaba tom·aniko ong·atangjolaha.
Mikkangchi kamrangko nambate ka·na man·na gita pilak officer-rangkon nangrime kam ka·china gitaba ua officer-rangko didiangaha.
Nongpoh Civil Hospital-o kulina sienggipa oxygen plant-ko nieani somoio a·dokni Chief Minister baksa Nongpoh-ni MLA Mayralborn Syiem, Ri Bhoi a·jani Deputy Commissioner RM Kurbah aro gipin official-rangba dongpae bak ra·angaha.
