SHILLONG: A·doko koela badingenggiparangni kosako bichal ka·gen ine Deputy Chief Minister, Prestone Tynsong mijalo changsatai mikrakataha.
Lockdown ra·gatatomangba a·doko niamgri koela badinganirang chotchangjaenga ine koborrango separakani ja·mano, dosi dakgiparangni kosako bichal ka·gen ine Deputy Chief Minister ka·dongatani kattarangko aganaha.
Niam gri koela badingani gimin sing·anina aganchakengon, dosi dakgiparangni kosako bichal ka·gen aro East Jaintia Hills-o ong·ja maina aro gipin district-rangoba ong·ja maina lockdown-ni somoio koela badinganirang dongjachina gita nirokchina Sorkari, pilak Deputy Commissioner-rangna u·iataha ine Pa Tynsong aganaha.
“Ia somoimitingo nangai nangjae re·ruraanirang dongna nangjawa aro koelade nangchongmotgipa ong·ja aro ian nangchongmotgipa bostuba ong·ja,” Dy CM aganaha.
Indakeba nikatna man·a je re·anggipa somoio bolbri koela trak garirangko Nongpoh-o rim·aha, rim·rikgipa bolbri koela trak garirangoni bolgni – ML04D2067 aro ML02767-de NPP dilgipa Nidamon Chulet-ni ong·achim ine parakaha, jean social activist, Agnes Kharshiing aro Amita Sangma mangko doka satanio jak donggipa ong·achim.
NPP dilgipani koela trakrangko rim·a man·gipani bidingo sing·anina aganchakengon, niam pe·gipakode jeni kosakoba bichal ka·aigen ine Pa Tynsong aganaha.
“Dongimin niam donga, aro NPP dilgipa ba jeba ong·chong darangkon niamo pangchake bichal ka·gen,” Tynsong aganaha.
Koborrango parakani gita rim·gimin trakrangko watpilchina dadita sin·jete aganatanirang dongahachim indiba police mokordoma segataiaha.
