GHADC official sakgni, NGEA dilgiparangni kosako badi ka·doa

TURA: GHADC-ni sakgni official-rang jeni kosako NGEA, police-na badi ka·ahachim, uamang, Association-ni memborrangni kosako badi ka·doskaha.
Mni Bristibar salo NGEA-ni membor-rang sakgni official-ni kosako office-ni nangchongmotgipa document ba lekkarangko niamgri jakkalsrete an·tangtangna namgniko ra·enga ine police-na badi ka·aha. GHADC-o kam ka·giparang, office-ko an·tangtangni namgnina jakkalna bil dongja ineba NGEA janapaha.
Indiba GHADC-ni official- Civil Works department-ni Superintending Engineer Shukumar N Marak aro Executive Engineer Niksang S Momin- uamang, NGEA-ni dilgiparang- Senora Johny Arengh, Brithen M Sangma, Flaming B Marak aro Henyvirth Ch Marak- uamangni kosako badi ka·doskaha.
Indake sakgni official-rang jedakgipa inquiry ba sandianiko dakchina chinga ra·chakaigen ine talataha. Aro uamangni kosako badi ka·aniara kakket ong·ja ineba agantalaaha.
“Skanggipa Association, chingni kosako FIR ka·na gita bil dongja, police-ona re·angna skang Secretary ba GHADC-ni gipin authority-na badi ka·chengna nangachim. Chingni authority-an chingni gimin maming badi ka·aniko man·ja aroba chinga je kamrangko ka·aha, uko authority-ni u·ianio ka·aha.”
Unbaksana sakgni official-rang authority-ni ge·etaniosa office-ona re·angaha ineba agantalataha. Minggipin office-o bijoli dongjani gimin kamrangko ka·na man·dikenga, uni giminsa kamni file-rangko noktangona ra·ange kam ka·aha ine aganaha.
“Authority-na u·iate, matchotgija dongenggipa kamrangko matchotatna miksonganio office-oni file-ko nokona ra·ange kam ka·aniara crime ong·ja. Chingni bimingko ong·siatna miksonganiosa badi ka·aha, ine GHADC-ni sakgni official aganaha.”