TURA: Meghalaya Chief Minister Conrad K. Sangma, Deputy Speaker Timothy D. Shira-ni dongpaanio mijal Sonibar salo North Garo Hills district-o Covid-19 sabisiko dakgrikchakna tarisamsoani bidingo district administration aro health department-ni official-rang baksa nipile chanchirimaniko dakangaha.
Uamangni tom·e chanchirimani ja·mano Resubelpara Community Health Centre (CHC)-ona re·ange nirokeani somoio jinmarangna aganengon, ua Resubelpara CHC-o minitprako litre 150 on·a man·gipa oxygen plant-ko songanggen, jean ge 15 sana-banani palangrangna chu·onga gitan balwa ba (high flow oxygen)-ko on·a man·skagnok ine parakataha.
Chief Minister-ni u·iatani gitade, North Garo Hills a·jao covid sabisi man·giparang inditana kingking bang·kujagenchimoba, tanggitik nangani somoio altue jakkalna man·a gita pilak nangchongmotgipa bosturangko tarisamsona nangenga.
Uandake nangani kri nigrike, Covid sabisi aro uandakgipa sabisirang baksa dakgrikchakanio jakkalani ICU gnanggipa palangrang bol 3-ko tarie donskachina jolni an·seng-baljokanio dangdike on·enggipa official-rangko didiangjolaha.
“Covid sabisi man·giparangko sana-bananio jakkalna Resubelpara CHC-o palang ge 40-ona bariatchina official-rangko didiataha. Uandake, biap ba a·damko nigrike covid an·giparangko sana-bana gita ge 150 palangrangko tarie donskachina gitaba jolni dilgiparangko didiangjolaha,” ineba Chief Minister parakataha.
Uarangna agreba, North Garo HIlls-na rong 150 oxygen cylinder-rangko on·atgen. Jedaken da·o dipet Resubelpara CHC-o rong 84 B type cylinder, rong 15 D type cylinder-rang aro rong 15 oxygen concentrator-rangba dongenga ineba ua aganaha.
Uamangni tim·e chanchirimani somoio a·jani health official-rang, hospital-o sana-bananio bang·a neng·nikanirang, jekai nurse aro technical staff-rangko man·chape mande chu·ongjaengani bidingo niatpachina aro Manikanj PHC aro Damas PHC-rangna Ambulance bolprakprak on·pachina gita Chief Minister-o mol·molangjolaha.
