SHILLONG: Meghalaya a·dokni private hospital-rango manderang, Megha Health Insurance Scheme (MHIS)-ko ra·anio neng·nikanirangko chagrongna nangtokengani gimin ia neng·nikaniko health department, salgnini gisepon namatgen ine Mongolbar salo, a·dokni Health Minister AL Hek, ku·rachakaniko on·angaha.
MHIS-ni kamrangko nipilna gita tom·aniko ong·atani ja·man, kobor ra·timgipa manderang baksa agangrikengon, private hospital-rango manderang ia scheme-chi sanna bananirangko ra·anio neng·nikanirangko chagrongna nangtokengani gimin sorkari, ia neng·nikaniko salgnini gisepon namatna ja·ku de·gen ine Health Minister parakataha.
“Private hospital-rango manderang MHIS-ko ra·anio neng·nikanirangko chagrongna nangtokenga ine chinga koborko man·soaha. Chinga ia neng·nikanirangko salgnini gisepon namatna gita kamko ka·gen,” ine Hek parakataha.
Koborko on·ani gitade, da·o dipet Meghalaya a·dokni dingtang dingtang private hospital-rango COVID-19 man·gipa sak 866 manderangko done sanenga aro ming 4099 COVID test-rangkoba ka·manaha.
COVID-19 man·gipa manderangko sanna gita gong kror 2.11 tangkarangko aro COVID-19 test-rangna gong lak 79.5 tangkarangko chamatchengaha ine Health Minister parakataha.