TURA: Garo Hills Autonomous District Council (GHADC)-o kam ka·enggiparangna bilsisani dormaharangko gital pay scale-o on·china Sukrobar salo Non Gazetted Employees Association (NGEA)-ni dilgiparang, a·dokni Chief Minister Conrad K Sangma-ko mol·molataha.
NGEA-ni parakatani gitade, Meghalaya a·doko sorkariko NPP-an chalaienga aro GHADC-oba NPP dolan EC-ko dilengani gimin GHADC-o kam ka·enggiparangna dormaharangko on·e neng·nikanirangko namataniba NPP dolni daitoan ong·engachim.
“Uni gimin chinga chingni neng·nikanirangko ma·sichake chingni dabianirangko knachakchina Chief Minister-ko mol·molenga,” ine NGEA-ni secretary Brithen M Sangma parakataha.
Executive committee-ni on·enggipa jabongani dormahako gitcham pay scale-ode maming dakeba ra·chakjawa ine janapatengon, GHADC-o kam ka·enggiparangna bilsisani dormahako gital pay scale-o on·genchimode uamangni jingjengataniko dontonge kamtangtangko ka·piltaigen ine NGEA-ni dilgipa parakataha.
GHADC-o kam ka·enggipa manderangni neng·nikanirangko namatna gita GHADC-ni CEM Benedic R Marak ku·rachakahachim indiba uamang baksa changni chang golpoani ja·manoba ua uamangni dabianirangko chu·sokatna man·jaha ineba NGEA suk ong·gijaniko parakataha.
Bilsisani dormahako gital pay scale-o on·na ku·rachakaniko on·jaskalde GHADC-o kam ka·enggiparang jingjengataniko dontongjawa ineba NGEA parakataha.
GHADC-o kam ka·enggiparang ja 34-ni dormaharangko man·kujaengani gimin kamrangko ka·gija jingjengatengani a·sel GHADC-o kamrangko ka·na man·jae pilakni gita neng·nikanirangko chagrongna nangengahachim ine nikna man·a.
GHADC-o kam ka·enggiparang komibeoba bilsisani dormahako gital pay scale-o on·china dabitokengoba, gital executive committee, uamangna jabongani dormahakosan gitcham pay scale-osa on·na ku·rachakskaahachim.