SHILLONG: East Khasi Hills a·jao salantian COVID-19-ko man·giparang batroroangkuengani gimin lockdown-ko re·baenggipa June 7 tarikona ra·dodapattaiaha.
Sukrobar salo a·dokni Deputy Chief Minister Prestone Tynsong-ni parakatani gitade, East Khasi Hills a·jao COVID man·giparang komikujaengani gimin lockdown-ko June 7 tarik pring 5:00 bajiona ra·dodapattaiaha.
East Khasi Hills a·jao lockdown-ko June 7 tarikona ra·dodapattaiahani gimin East Khasi Hills a·jani pilak biaprangon sorkarini dongimin niamrang, jekai a·ja damsaoni damgipinona re·ruraani, a·dok damsaoni damgipinona re·ruraani, skatang nokoni ong·katani, nangchongmotgipa aro sam dokkanrangna agre gipin dokkanrangko kuliani aro uandakgipa gipin kamrangko champengatangkugen ine Tynsong parakataha.
East Khasi Hills a·jani dingtang dingtang gittimrangona manderangni nangchongmotgipa bosturangko sokate on·na East Khasi Hills a·jani Deputy Commissioner, niroke kamko ka·anggen ineba Deputy Chief Minister parakataha.
Sorkari office-rangko kuliani bidingo janapatengon, Personnel department-ni u·iatgimin office-rangna agrede pilak central aro state office-rangko chipe donangkugen ine Deputy Chief Minister parakataha.
Tynsong-ni u·iatani gitade, bank-rangko May 31 aro June 1 tarikrangode bang·gija kam ka·giparangchi kamko ka·e kulina man·gen indiba bank-rangko attam 4:00 bajion chipna nanggen.
Post office-rangkoba June 2 tarikoni June 4 tarikona sorkarini dongimin niamrango pangchake aro bang·gija kam ka·giparangchi kam ka·na on·anggen.
Mande sianirangode district administration-oniko permission ra·chengani ja·man sak 10-na bate tom·na man·jawa ine Deputy Chief Minister parakataha.