SHILLONG: Meghalayao, gnigipa changna COVID sabisi sanapaoni skanggipa changna mijal salni bako COVID man·dapgiparangna bate COVID-oni nampilgiparangan bang·bataha, jeon sak 731 COVID man·dapaha aro sak 941 gipinrang nampilskaaha.
Bristibar saloni Sukrobar salona konta 24-ni gisepon Meghalaya a·dok gimiko sak 20 manderang COVID-19 man·e siangdapaha aro ia apsan salon sak 731 manderang COVID-19 man·dapskaaha.
Sukrobar salo COVID-19 man·dapgipa sak 731 manderangko channe da·o Meghalaya a·dok gimiko COVID-19 man·e dongenggiparang gimik sak 8025 gapengaha aro COVID man·e sianggiparangara gimik sak 544 gapskaengaha.
Sukrobar salo positive ong·gipa sak 731 manderangoni sak 15-de East Garo Hills-o, sak 27-de East Jaintia Hills-o, sak 346-de East Khasi Hills-o, sak 9-de North Garo Hills-o, sak 147-de Ri Bhoi a·jao, sak 11-de South Garo Hills-o, sak 27-de South West Garo Hills-o, sak 21-de South West Khasi Hills-o, sak 69-de West Garo Hills-o, sak 27-de West Khasi Hills-o aro sak 32-de West Jaintia Hills a·jao ong·a.
Konta 24-ni gisepo COVID man·e sianggipa sak 20 manderangoni sak 17-de East Khasi Hills-o, sak 1-de West Jaintia Hills-o, sak 1-de Ri Bhoi a·jao aro sak 1-de West Garo Hills a·jao ong·skaa.
Ia apsan salon gimik sak 941 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 25266 gapskaengaha.
