SHILLONG: Meghalayao ia anti a·bachengaonin COVID-19 sabisiko man·giparang ka·sne ka·sne komiangna a·bachengaha, jeon a·doko COVID man·dapgiparangna batede mijalming gnigipa salna joljol sabisioni nampilgiparangan bang·batengaha. Unomitingo sabisi man·e sianggiparangba aditan komiangaha ine nikna man·a.
Mijal Sonibar salni bako sak 613 manderang a·doko COVID sabisiko man·dapaha, uamangoni East Khasi Hills-o sak 320, Ri-Bhoio sak 87, West Garo Hills-o sak 74, North Garo Hills-o sak 28, West Jaintia Hills-o sak 23, East Garo Hills-o sak 19, South West Garo Hills-o 17, West Khasi Hills-o sak 17, East Jaintia Hills-o sak 12, South West Khasi Hills-o sak 11 aro sak 5 South Garo Hills-oni ong·a.
Unomitingo mijal salni bako sak 890 manderang COVID sabisoni nampilskaaha, uamangoni
East Khasi Hills-o sak 535, Ri-Bhoio sak 205, West Garo Hills-o sak 52, West Jaintia Hills-o sak 18, North Garo Hills-o sak 16, West Khasi Hills-o sak 14, East Jaintia Hills-o sak 13, South West Garo Hills-o sak 13, East Garo Hills-o sak 9, South Garo Hills-o sak 9 aro South West Khasi Hills-oni sak 6.
COVID sabisi man·giparangoni batanggimin konta 24-ni gisepo East Khasi Hills-o sak 5, Ri-Bhoio saksa aro South West Garo Hills-o saksa gimik sak 7 siangdapaha.
Meghalaya a·doko COVID-19 sabisiko man·giparang mijal salni bakona gimikchide sak 34,448 gapahachim, uamangoni sak 26,156 manderang sabisioni nampiltokaha, sak 551 manderang sabisio uamangni janggirangko gimaataha, COVID sae dongenggiparang a·doko da·oba sak 7741 dongkua.
