SHILLONG: A·dok sorkari, bilsi 2021-2022-ni MLA scheme-ko watna ba parakatna jotton ka·enga, jedakode legistor-rang uamangni constituency-ni manderangna dakchakna gita man·gen ine Deputy Chief Minister Prestone Tynsong parakataha.
“Pandemic-ni somoio gimik MLA-rangan namen kam ka·tokenga. Aro chinga man·a dipet ta·raken scheme-ko watna jotton ka·gen, ine Deputy CM Tynsong, kobor ra·timgiparangna parakataha.
Pandemic-ni a·sel lockdown-ko ra·gatanio salantio hajira kam ka·e cha·giparang baditan neng·niko man·enga iako sorkari u·ina man·a. Uni gimin champenganiko olgrokna chinga chanchienga. Mikkang antioni MGNREGA-o kam ka·giparangko kam ka·na cholko on·gnok ine Tynsong aganaha.
Uandake sorkari, Mawiong-o donggipa Meghalaya State Agricultural Marketing Board -o temporary wholesale vegetable market-ko songna tik ka·aha. Jedakode Ri-Bhoi-oni game cha·giparang uamangni ge·e game man·gipa bosturangko palna gita man·gen.
Transport Minister Sniawbhalang Dhar, Agriculture Minister Banteidor Lyngdoh aro senior official-rang Mawlai Mawiong-ni ISBT-ona re·ange temporary wholesale vegetable ba me·su-samjak dokanko kulina mni Sukrobar salo nirokeaha.
