TURA: South West Garo Hills a·jao badiaba badiaba fair price shop (FPS) dealer-rang, Pradhan Mantri Garib Kalyan Anna Yojana (PMGKAY)-ni mirongrangko kg-prako gong 2 ba gong 3/- ka·e manderangna palenga ine koborrangko man·soahani gimin ia scheme-ni mirongrangko tangkana ong·gija indin suale on·china South West Garo Hills a·jani Deputy Commissioner Ch Ramakrishna mikrakataha.
Re·anggipa bilsio gitan ia bilsioba ma·mong sorkari, PMGKAY-ni mirongko May aro June jagnina, NFSA-ni namgnirangko man·enggipa nokdangrangna indin on·attaiahachim ine nikna man·a.
Indake ong·genchimoba, badiaba badiaba FPS dealer-rang ia mirongko salbaani korosrangko man·kujaenga ine pa·sikenba, manderangoniko ia mirongna kg-prako gong 2/- ba gong 3/- ka·e ra·skaengachim.
Indake ong·engon, iandake niam gri FPS dealer-rangni kam ka·aniko nirokchina gita South West Garo Hills a·jani Deputy Commissioner, dingtang dingtang songni vigilance committee-rang, nokmarang aro gaonburarangna ge·etaniko on·ataha.
NFSA beneficiary-koba iani bidingo NFSA cell room-ni 7628802948 nombor-ona ba official whatsapp nombor 9402327773-ona aro Toll free nombor 1967-ona u·iatchina gita Deputy Commissioner didiataha.
Ia ge·etaniko manijagenchimode Meghalaya PDS Control order 2004 aro Essential Commodities Act 1955-ni ning·o PFS dealer-rangna dongimin Section 3(Point No 6)-o pangchake rakgipa ja·kurangko de·anggen ine SWGH a·jani Deputy Commissioner mikrakataniko on·angaha.