TURA: South West Garo Hills a·jani Mellim PHC ning·o COVID-19-ko man·giparang dongahani gimin Rerapara C&RD Block-ni ning·o donggipa Allabagre-II Songma songgimikkon ‘Containment Zone’ dakatna gita nangaha ine South West Garo Hills a·jani Deputy Commissioner Ch Ramakrishna parakataha.
Ia Allabagre-II Songma songko ‘containment zone’ ine parakmanahani gimin da·o dipet gipin biaprangoni darangba ia songona re·angna man·jawa aro songni ning·o donggipa manderangba ia biaponi ong·katna man·jawa ine South West Garo Hills a·jani Deputy Commissioner parakataha.
“Rerapara block-ni Allabagre-II Songma songko ‘containment zone’ ine ra·enga dipetde gipin biaprangoni darangba ia biapona re·bana man·jawa aro ia biap ning·o donggipa manderangba noktangtangoni ong·katgija dongna nanggen. Da·omiting somoio ia biapo jinma tom·anirangko aro program-rangko ong·atna man·jawa aro ia biapo donggipa pilak dokkanrangkoba chipe donkuna nanggen,” ine DC parakatenba, ia biapo donggipa manderangna nangchongmotgipa bosturangko district administration-ni songe on·gipa dolrang, sokate on·skagen ine talatangaha.
Deputy Commissioner-ni parakatani gitade, Allabagre-II Songma songko ‘containment zone’ ine chanengmiting somoio contact tracing-ko dake porikkarangko ra·e nianggen.