SHILLONG: A·doko adita Party dilgiparangni gisepo melgrikgijanirang ong·engon, nangchongmota ong·ode niamo pangchakenba gitcham Minister aro BJP-ni gitcham State Vice President Dr KC Boro-ko party-oniko a·rikgalgen ine State BJP president Ernest Mawrie Robibar aganaha.
“Nanga ong·ode, Boro-ko party-oni rikgalataigen’’ ine Mawrie raken aganaha.
Batanggimin GHADC election-o chena kragipa seat-rangon State BJP-ni sirikani gimin, Mawrie-ni a·selsa indake ong·aha ine State BJP-o KC Boro-ni re·dilgipa dilgiparang Mawrie-ko matnangtokaha aro uko BJP State President-oniko ra·galenba gital president-ko songskachina gitaba BJP-ni chugipa gadangni dilgiparango dabiahachim.
An·tangni kosako matnanganirangna inchakatskaengon, KC Boro, party-ni constitution-ko pe·en, ua an·tangni ripengrangna party tikitrangko on·china bi·ahachim ine Mawrie aganaha.
“Anga indake dakna man·ja, maina dakbewalko ja·rikna nanga, chingo dolsa election committee donga, jemangan candidate-rangko seokchina bimingrangko watata, indiba ua ia niamrangko pe·enba angko uni ripengrangna party tikitrangko on·china gita aganahachim” ineba Mawrie, Boro-ni kosako matnange aganaha aro iako dakjani a·selan ua, Boro aro adita party-ni manderangchi nidikako man·enga, Mawrie aganaha.
Unomitingo Boro-ba Mawrie-ni kosako indake matnangatskaaha je “Mawrie-ni a·sel party-o bak ong·tokengaha, party-ni darang a·gipi dilgipaba da·alo Mawrie baksa ong·jaengjok. Pilakan uko watgaltokaha, ua party-ko re·dilna cholijaha, uni (Mawrie) a·selan da·alo party bilgriangengaha,” Boro aganaha.
A·dok BJP-ni namgnina, Earnest Mawrie-ni palo gital dilgipako party-na seokna nangengaha ine Ma·mong BJP-ni dilgiparangko mol·molataha ineba Boro aganaha.
A·dok BJP-ko da·ode Mawrie aro State Vice President aro treasurer iamang sakgittamchisan chalaia gita dakengaha ineba Boro matnange aganaha.
