TURA: Garo Hills Autonomous District Council (GHADC)-o gital executive committee-ko rikchengaonin NPP-chi dilenggipa Garo Hills Progressive Alliance (GHPA)-o bakrimaniko on·na jechakahaoba da·o bon·kame Tura-ni BJP MDC Bernard N Marak-ba ia gital executive committee-o bakrimna gita re·baaha.
“Angni dilgiparangni ge·etanio pangchake aro 2021 bilsini July jani gisepon GHADC-o kam ka·enggiparangna jachetni dormaharangko on·na ku·rachakahani gimin da·o angaba nang·ni Executive Committee-na chakpaaniko on·enga,” ine Bristibar salo, GHADC-ni CEM Benedic R Marak-na seatgipa chittio Tura-ni MDC Bernard N Marak parakataha.
Ia chang GHADC election-o BJP dolni candidate sakgni, chong·motan Tura-ni MDC Bernard N Marak aro Dalu-ni MDC Promod Koch, chegipa ong·e biap damgniko man·rikahachim. Election-ni result-rangko parakatchengaonin Dalu-ni MDC-de NPP-chi dilenggipa GHPA-o bakrimeahaoba Tura-ni MDC-de ia alliance-o bakrimna gita jechakskaengachim.
A·bachengaonin NPP-chi dilenggipa executive committee-o bakrimahani gimin ia gital executive committee-o BJP-ni MDC Promod Koch-de biapko man·rikskaaha aro uandaken GHADC-ni mongsonggipa agriculture, sports & youth affairs aro sand market portfolio-rangkoba man·rikskaaha.