TURA: Garo Hills Autonomous District Council (GHADC)-o Tribal ong·gijagipa MDC saksako Forest Advisory Committee-ni chairman songahani gimin Tura-ni dingtang dingtang dolrang raken jegalataha.
Adita salrangna skangsan, Zikzak-ni Independent MDC Aktar Ali-ko NPP-chi dilenggipa Executive Committee, Forest Advisory Committee-ni chairman songahachim ine nikna man·a.
Indake ong·engon, GHADC-o Tribal ong·gijagipa MDC-ko Forest Advisory Committee-ni chairman songahani gimin New Tura Development Forum (NTDF), Tura Garo Senior Citizens’ Forum (TGSCF) aro Garo Graduates Union (GGU) jegalatenba, batanggimin somoirangonin GHADC-ni kamrango aro GHADC election-rango Tribal ong·gijagipa manderangni bak ra·aniko Garo Hills-o songdongenggipa manderang jegaltokengoba ia Non-Tribal MDC-ko Forest Advisory Committee-ni chairman songskaaha ine NPP-chi dilenggipa Executive Committee-ko matnangataha.
“Garo Hills-ni manderang, GHADC-o namroro silroroaniko nikna aro jatko chel·chakna gita ia gital Executive Committee-o ka·dongbee nisengengachim indiba jatko chel·chakna aro jatni namgnirangna kamko ka·ani pal ia EC, Tribal ong·gijagipa MDC-ko chairman songe Garo Hills-ni manderangna gisik saataniko ra·baaha,” ine dolgittam NGO-rang parakataha.
Indake ong·engon, ia Tribal ong·gijagipa MDC-ko Forest Advisory Committee-ni chairman songaniko ra·galpile Executive Committee-ni maming kamrangkon Tribal ong·gijagipa MDC-rangna on·jachina dolgittam NGO-rang dabiangaha.
Ia kamko jegalgrimchina aro ia MDC-ko ra·galpilchina dabianio bakko ra·china gitaba dolgittam NGO-rang, Garo Hills-o songdongenggipa manderangko didiataha.