TURA: Re·anggipa Sombar salo, songni manderang an·tangtangni bank passbook-rangko update ka·na gita Betasing SBI branch-ona re·angon bank-o kam ka·enggipa mande saksa, manderangni passbook-rangko gobrange galaha ine matnangenba ja·mano songni manderang Betasing SBI-o kam ka·enggipa mandeko jinma chadraptokaha ine kobor on·aha.
Kobor on·timgiparangni u·iatani gitade, Sombar salo songni manderang, an·tangtangni pass book-rangko update ka·na gita Betasing SBI branch-ona re·angahachim indiba bank-o kam ka·enggipa mande saksa, manderangni pass book-rangko kragija dake gobrange galahachim.
“Manderang an·tangtangni pass book-rangko update ka·na gitasa bank a·palo senge dongtokengachim indiba bank-o pass book-rangko update ka·timenggipa mande, ia pass book-rangko manderangni jako on·gija a·aonasa goe galataha. Iani giminsa manderang suk ong·tokjaha,” ine kobor on·timgiparang parakataha.
Ia bank-o manderangko indake jakkalani ian skanggipa chang ong·ja aro batanggimin changrangoba bank-o kam ka·giparang, manderangko rang·datesa aganrongachim ineba songni manderang parakataha.
“Bank-o kam ka·enggiparang chingna indin kamko ka·e on·enga ong·ja aro chingaba an·tangtangni tangka paisarangkosa bank-o donpaenga. Uamangni manderangko iandake jakkalania namen kragijani ong·a,” ine songni manderang parakataha.
Iani obostani bidingo talataniko on·angskaengon, ua iani bidingo Betasing SBI-ni official-rango sing·sandiataha aro kam ka·enggiparang iandake kamko ka·enga ong·ode ua mandeni kosako rakgipa ja·kurangko de·anggen ine SBI-ni regional manager Dharmanandha Banai Koch parakataha.
Ia a·selni bidingo am·sandienba salsani gisepon report-ko on·china gita Ampati SBI-ni official-na ge·etaniko on·atmanaha ineba Koch parakataha.