SHILLONG: Sonibar saloni Robibar salona konta 24-ni gisepo Meghalaya a·dok gimiko sak 542 manderang COVID-19-oni nampilna man·aha indiba ia apsan salon sak 390 manderang COVID-19-ko man·dapskaaha.
Robibar salo COVID-19 man·dapgipa sak 390 manderangko channe da·o Meghalaya a·dok gimiko COVID-19 man·e dongenggiparang gimik sak 4587 gapaha aro apsan salon sak 4 manderang COVID-19 man·e siangdapahani gimin a·dok gimiko COVID man·e sianggiparangara gimik sak 780 gapskaengaha.
Robibar salo positive ong·gipa sak 390 manderangoni sak 19-de East Garo Hills-o, sak 8-de East Jaintia Hills-o, sak 134-de East Khasi Hills-o, sak 28-de North Garo Hills-o, sak 80-de Ri Bhoi a·jao, sak 3-de South West Garo Hills-o, sak 5-de South West Khasi Hills-o, sak 49-de West Garo Hills-o, sak 14-de West Khasi Hills-o aro sak 50-de West Jaintia Hills a·jao ong·a.
Konta 24-ni gisepo COVID man·e sianggipa sak 4 manderangoni sak 3-de East Khasi Hills-o aro sak 1-de South West Garo Hills a·jao ong·a.
Ia apsan salon gimik sak 542 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 39,919 gapskaengaha.