SHILLONG: Meghalaya a·dokni Accredited Social Health Activist (ASHA) worker-rang, an·tangtangni man·na nangkuenggipa tangka paisarangko man·tokkujaengani gimin kamrangko dontongatna tik ka·angahani gimin, ASHA worker-rangni honorarium-ko japrako gong 1000-oniko gong 5000-ona bariate, uamangni man·gnirangko somoi gita on·rongchina Nongpoh-ni Congress MLA Mayralborn Syiem, a·dok sorkariko didiangaha.
Congress MLA-ni parakatani gitade, ASHA worker-rangni man·gniko bariatchina gita ua changni chang Assembly-oba ku·rang on·ahachim aro iani bidingo a·dok sorkari baksaba agangrikmanahachim.
“Skangonin ASHA worker-rangko sorkari nichanggalenga aro uamang an·tangtangko on·kange manderangna an·seng baljokaniko on·na kamko ka·engoba da·onan uamangni man·gnirangko sorkari bariatkujaenga. ASHA worker-rangna 2012 bilsimangonin a·dok aro ma·mong sorkarini on·na nangenggipa tangka paisarangko chu·gimik on·kujaenga,” ine Syiem parakataha.
Meghalaya a·dokni ASHA worker-rangnaba a·songni gipin biaprango on·enga gitan apsan dormahako on·china aro da·o gita COVID-19 giproroengmiting somoio komibeoba japrako gong 5000 ka·e on·china gitaba Congress MLA dabiangaha.
“ASHA worker-rangni man·na nanggipa gipin man·gnirang baksana honorarium-koba on·na nangchongmota,” ine Syiem parakataha.
Meghalaya a·doko aro mongsongbate songadam nokadamrango manderangna an·seng baljokanirangko on·na gita rakbee kamrangko ka·engoba ASHA worker-rangna, uamangni bang·gija man·paenggipa tangka paisarangko sorkari on·kujaengani gimin kamrangko dontongatna tik ka·angaha ine re·anggipa Sonibar salo Meghalaya ASHA Workers Union (MAWU)-ni president Merajune Myrsing aro adviser Sony Kharjana parakatahachim.
MAWU-ni parakatani gitade, COVID-19-ni giroroaniko warachakanio sorkari, batanggimin somoirangoba uamangna tol·e ku·rachakanirangko on·aha aro da·o uamang kamrangko dontongatskana tik ka·angaha.
Batanggimin somoirangoba iani bidingo union-ni membor-rang, a·dokni Chief Minister aro Health Minister-ko gronge agangrikahachimb indiba uamangna ku·rachakanirangko on·nana agrede da·alonan mamingkon dakkujaenga ineba MAWU parakataha.