TURA: Sombar salo, Tura-ni College of Community Sciences ba Home Science College-o ong·atanggipa ‘Nano Jackfruit Entrepreneurs’ program-o a·dokni Chief Minister Conrad K Sangma-ba dongpae bakko ra·angaha aro ia program-ko ong·atanio ua jinmana aganprakangengon, game ge·e cha·gipa aro bading chiwalgipa dolrangna gong 5000 ka·e on·enggipa Chief Minister-ni Support for Producers Group-ni gimin agan-talate on·angaha.
Meghalaya sorkarini ra·gatgipa ‘Jackfruit Mission’-ni bidingo talataniko on·angengon, te·brongoniko tarigipa ma·manti bosturangko tang·doatna gita a·dok sorkari kam ka·enga ine Chief Minister parakataha.
Ia Jackfruit Mission-ko a·dok sorkari, 2018 bilsio a·bachengatahachim aro ia Mission-ko Meghalaya sorkarini Food Processing Directorate jako ra·e ka·engachim ine nikna man·a.
Ia program-ni ning·o te·brongko ge·e cha·enggiparangna aro uamangni game ge·e man·enggipa bosturangko pala sim·anio dakchakna gita sorkari training-rangkoba on·engachim.
Chief Minister-ni parakatani gitade, ia program-ni ning·o game ge·e cha·enggiparang ba bading chiwale cha·enggipa manderang apsan dolrangko bikotenba, an·tangtangni kamrangko tang·doatna gita sorkarini on·enggipa dakchakanirangko ra·e kamrangko a·bachengatna man·enga.
Ia program-ko ong·atanio dingtangmancha, Food Processing Directorate aro Tura-ni Home Science College-ni ong·atanggipa training-o skie ra·anggipa manderangnaba Chief Minister-ni jakchi certificate-rangko suale on·angjolaha.
“Game ge·e cha·giparang aro bading chiwale cha·giparang, dingtang dingtang biterangoniko tarigimin bosturangko pack ka·e gipin biaprangona watna man·na gita packaging unit-rangko kulina gitaba sorkari, iandakgipa dolrangna dakchakanirangko on·enga,” ine Chief Minister parakataha.
Tura-ni College of Community Science-o bakan Technology Incubation Centre-ko kulignok aro iana da·o kamrangko ka·engaha ineba ia program-ko ong·atanio Chief Minister parakataha.
Garo Hills-ni dingtang dingtang biaprango karkanarangko bikote cha·anirangko tarienggipa dingtang dingtang dolrang baksaba ia tom·anio a·dokni Chief Minister agangrikangjolaha.