TURA: West Garo Hills a·jao aro mongsongbate Tura jillani badiaba badiaba sam dokkanrango sam aro uandakgipa gipin bosturangko dam bate palenga ine koborko man·soahani gimin, manderangni nangchongmotgipa sam aro gipin bosturangko dam bate paljachina West Garo Hills a·jani district administration aro Police department, mikrakataniko on·angaha.
Ia sal somoirango COVID-19 batrikrikengani a·sel manderang sam aro gipin bosturangko brena nangengon, sam dokkanrango iandakgipa bosturangko dam bate palskaenba, an·tangtangna lap dakskana jotton ka·tokengachim ine nikna man·a.
Indake ong·engon, badiaba sam dokkanrango iandake sam ba gipin bosturangko dam bate palenga ine nikgenchimode iani bidingo sepangbatgipa police station ba police outpost-ona ba Superintendent of Police (SP)-ona u·iatchina gita manderangko didiatenba, police-rang iandakgipa dokkanrangni kosako rakgipa ja·kurangko de·anggen aro nanggenchimode sam dokkanni licence-rangko den·galgen ine mikrakataniko on·angaha.
Bosturango segimin Maximum Retail Price (MRP)-na bate damrangko on·jachina gitaba West Garo Hills a·jani SP, manderangko didiataha.