TURA: West Garo Hills a·jao Meghalaya Teachers Eligibility Test (MTET) pass ka·gimin skigiparangna interview-ko ong·atanio sak 159 skigiparangoni sak 96 skigiparangkosan kamna seokaha ine skigiparangni matnanganina Tura Sadar-ni Sub-Divisional School Education Officer (SDSEO) talataniko on·angaha.
SDSEO-ni parakatani gitade, Tura division-ni ning·o ge 114 kamrangna advertisement-ko ba u·iataniko on·aha aro ia ge 114 kamrangna gimik sak 159 skigiparang dorgastorangko galahachim. Indake ong·genchimoba, interview-ni somoio sak 10 candidate-rangde absent ong·aha aro sak 149 skigiparang interview-ko mikkangpaaha.
Sorkarini advertise ka·gipa ge 114 kamrangoni ge 18 kamrangde Mother Tongue ba jattangni ku·siksa ong·a aro ge 96 post ba kamrangnade merit list-o pangchake sak 96 skigiparangko kamna seokaha ine SDSEO parakataha.
Ge 18 post-rang ba kamrangni gimin talataniko on·angengon, lower primary skulrangode Mother Tongue subject-rangko skie on·ani jattangni ku·sikchisa ong·na nanga aro ia ge 18 post-rangara Non-Garo ba A·chik ong·gijagipa gipin jatrangni ku·siksa ong·ani gimin aro interview-ni somoio gipin jat candidate-rang dongjani gimin ia ge 18 post-kode bangbang ong·e donna nangaiaha ine SDSEO parakataha.