SHILLONG: BJP-ni ma·mong dilgiparangan term ba somoi bon·aona party-ko dilaniko nangnikenga ine Meghalaya BJP unit-ni President Ernest Mawrie-ni mnisalo a·kange aganani ja·mano, party dilgiparang agantoka je mikkang election-ona party-ko tarisona gita chinga dilgipako dingtangatako nangnika.
Meligrikna man·gijagipa dilgiparang aro uagitan a·dokni bang·bata dilgiparangan Cabinet Minister, AL Hek-ko, party president-ni kamko jako ra·ako nangniktokenga.
Unomitingo Cabinet Minister, AL Hek unaskangon a·doko BJP-ko skotong ong·e re·dilna skanikoba parakahachim.
“Bebegita Hek party-ko skotong ong·e redilgenchimode, re·baenggipa election-o bang·bata seat-rangkoba chena man·gen, ong·jaode da·oni obosta gita ong·aiode haida ge·sa seat-koba chena man·srangjanaba donga’’ ine dilgiparang aganan baksa ia pilak obostarangkon ma·mongni dilgiparangna u·iataha ineba parakaha.
Indake ong·genchimoba, gnigipa changna COVID sabisichi sinjetako man·ani a·sel ma·mong dilgiparang a·dokona wenba man·jaha aro chingni nangnikanikoba chu·sokatna man·kujaenga indiba da·o Amit Shah-ni re·bao dingtanganiko a·bachengatgen, uamang aganaha.
“Chinga chingni dabigipaon ga·chataigen maina Mawrie aro Sarvan Jhunjhunwala mang Congress-na chakenga, uamangni, a·dok sorkarini kosako matnanganirangko a·bachengatani a·selsa, re·anggipa GHADC election-o Congress, ka·dongsoana batpile seat-rangko cheaha,” dilgiparang agandapaha.
Indake saksa sakgipinni kosako matnanggrikanirangko niaten, BJP da·omitingo bakgni ong·enga ine nikatna man·a.
Gipin gipin mamlarang baksana GHADC-o tangka cha·boke cha·a ine MDA sorkarini kosako party president, Ernest Mawrie-ni matnanganiko nakatata intal BJP-o dol ong·bana a·bachengaha, je dolan, MDA Sorkari baksaan bakrimengachim.
