TURA: 2019 bilsimango bikotgipa All Garo Hills Merchants Association (AGHMA)-ko Societies Act XXI of 1860-o pangchake register ka·enba gital dilgiparangko seokangaha ine u·iataha.
Ia AGHMA-ko dilna gita seokako man·gipa manderangara, president-na Thoseng Cheba A Sangma, vice president-na Better M Sangma, general secretary-na Dremingbarth B Marak, joint secretary-na Balchina T Sangma, additional general secretary-na Ronald S Sangma, finance secretary-na Pikson A Sangma, accountant-na Pina B Marak aro advisor-na Evarest S Sangma ong·a.
Gipin biaprangoni niam gri Garo Hills-ona napsrukbae bading chiwalanirangko dakengani gimin iandakgipa kamrangko nirok sandina aro Garo Hills-o bading chiwalgiparangni kamrangko namdapatna kamrangko ka·na gita ia association-ko 2019 bilsio bikotaha ine AGHMA-ni dilgiparang parakataha.