TURA: Dadenggre sub-division-ko district songchina dabianiko da·oba watchanggaltaiahani gimin Dadenggre District Demand Committee (DDDC) suk ong·gijaniko parakataha.
Committee-ni parakatani gitade, ru·uta bilsirangonin Dadenggre sub-division-ko district songchina dabitokengachim indiba sorkari, iani dabianiko knachakgija gipin sub-division-kosa district songna parakatahachim.
“Dadenggre-ko 1982 bilsion civil sub-division songahaoba maming namroro silroroaniko nikna man·kujaenga aro da·o Dadenggre-ko sub-division songaoni bilsi 40 ong·na sipilengahaoba maming namdapanirang dongkujaengani giminsa chinga ia sub-division-ko gital district songchina dabiskaengachim,” ine DDDC-ni chairman Francewell Marak parakataha.
DDDC-ni u·iatani gitade, 1999 bilsion GSU Dadenggre unit aro All Garo Union Dadenggre unit-ni dilanichi, Dadenggre sub-division-ko district songchina gita dabidilchengahachim aro uni ja·man iani bidingo 2006 bilsini August jao a·dokni gitcham deputy chief minister Donkupar Roy-ni jako memorandum-ko on·atahachim. Uni ja·man, 2012 bilsioba GSU Western Zone (North) Dadenggre-ni dilgiparang, a·dokni gitcham chief minister Mukul Sangma-ko Shillong-o gronge Dadenggre-ko district songchina gita didie memorandum-ko on·ataiaha. Uni ja·manoba 2015 bilsio Dadenggre jolo donggipa dingtang dingtang dolrangni bakrime bikotgipa Association for Dadenggre Development (ADD) dolni dilgiparang iani bidingo a·dok sorkarina memorandum-ko on·taiahachim.
“Chinga dingtang dingtang dolrang Dadenggre-ko district songchina gita dabiengoba ku·cholsan ku·rang on·na dongjaenganichi aro an·tangtangni gisepon ku·mong nangrima dongjaenganichi chu·sokna gita man·jaenga ine nikenba, 2015 bilsini March 8 tariko Dadenggre-ni ning·o donggipa dingtang dingtang dolrang nangrime chingni dabianiko bilakbatatna gita tom·e chanchirimaha aro uandaken ua somoionin Dadenggre District Demand Committee (DDDC)-ko songe dabianiko bilakbatatna a·bachengahachim,” ine DDDC-ni dilgiparang parakataha.
DDDC-ni parakatani gitade, Dadenggre civil sub-division-ko bak dake Raksamgre-ko civil sub-division songahaoba manderang district-kosa nangbatenga ine nikenba, Dadenggre district-ni ning·o Dadenggre aro Raksamgre civil sub-division man·gopatskachina uamang dabina a·bachengahachim.