SHILLONG: Budbar pringwalo, East Jaintia Hills a·jani Khliehriat-o IED boma gopretaha ine kobor on·aha.
Koborko on·ani gitade, ia boma Budbar pringwalni 1:30 bajimango, Khliehriat-ni police reserve building-o gopretaha.
East Jaintia Hills a·jani SP Jagpal Singh-ni u·iatani gitade, ia boma gopretanio police reserve-ni boundary wall nosto ong·atako man·aha indiba boma gopretgipa quarter-rango darangba dongjani gimin manderang darangba saknaanirangko man·jaha.
“Boma gopretgipa biapona chinga Shillong Police headquarter-oniko Bomb Disposal Squad, Crime Scene Unit aro gipin dolrangko okamataha,” ine SP parakataha.
Da·o dipet ia boma gopretanio jak donganiko darang dolrangba a·kanga dongkujaenga aro maini gimin ia biapko boma godapahachim, ukoba name ma·sina man·kujaenga ine u·iataha.
Ia a·selni bidingo am·sandianirangko dakna a·bachengataha ine Police officer parakataha.