TURA: West Garo Hills a·jani Rajabala bazar jolrango ma·sina man·gijagipa nokdangrang, nokrangko rike songdong a·chatokenga ine Garoland State Movement Committee (GSMC) Rajabala circle parakatenba, iani bidingo sandirikkitaniko dake nanga gita ja·kurangko de·china Garo Hills Autonomous District Council (GHADC)-ni deputy Chief Executive Membor (CEM) Nikman Ch Marak-na sedoataha.
GSMC Rajabala circle-ni u·iatani gitade, Rajabala bazar jolrango ma·sina man·gijagipa gital nokdangrang ia biapona katnapenba nok-jamrangko rike dongtokenga aro ia jolrango batanggimin bilsirangonin gipin jatrang a·a pattarangko tarie songdong a·chatokengahachim.
“Ia jolrango gipin biaprangoni nokdangrang a·a pattarangko tarie dongtokengahani a·sel district council-na aro A·chik a·songna gimaani ong·engaha. Uni gimin Rajabala bazar-o baditana kingking GHADC-ni a·arang dongachim, uko sandirikkite nanga gita ja·kurangko de·ode namgen,” ine GSMC Rajabala circle-ni dilgiparag, GHADC-ni deputy CEM-na sedoatgipa chittio parakataha.
Singimari-oni Garobadha-ona dakanggipa rama jol gimikon nangana batpile ro·ong quarry aro ro·ong jetani karkanarangko kuliengani a·sel ia jolrango game ge·e cha·paenggipa manderang neng·nikanirangko chagrongna nangtokengaha ineba GSMC Rajabala circle, GHADC-ni deputy CEM-na badi ka·doataha aro ia jolrango niam gri kulienggipa ro·ong quarry aro ro·ong jetani karkanarangko chipatchina gita didiangaha.
“Singimari-oni Garobadha-ona dakanggipa rama jol gimikon ia somoirango niam gri ro·ong quarry aro ro·ong jetani karkanarangko chalaienga ine nikna man·a aro ia jolrango a·king nokmarangba gipin biaprangoni re·baenggipa a·gital mande aro company-rangna iandakgipa karkanarangko kulina on·enga,” ine GSMC Rajabala circle-ni dilgiparang janapatenba, ia jolrango mikkangchiba ro·ong quarry aro ro·ong karkanarangko kulie chalaiangkugenchimode A·chik a·songni bang·bata a·arangan gimaaniona sokgen ine parakataha.