SHILLONG: Re·anggipa Sombar, chong·motan Assam Assembly Budget Session-ni skanggipa salo Assam sorkarini gita ra·bagipa Cow Preservation Bill-ara Meghalaya a·doko matchu den·e palbadinggipa dolo mikkangchi nangchakenaba donga ine uamang jajrengsona a·bachengaha.
Butcher Association of Meghalaya (BAM), mejal Sukrobaro an·tangtango nangchakena jajrengsoaniko parakatengon, uamang Meghalaya Deputy Chief Minister Prestone Tynsong-ko iani bidingo Assam sorkari baksa mikkangchi Meghalaya a·dokona matchu salbaenggipa trak garirangko maming daken champengjachina gita agan-golpogrikskachina didiangaha.
BAM president Esron Marwein-ni deputy chief minister-na sedoatgipao janapatani gitade, Meghalaya sorkari, Assam a·dok sorkarini apsan gadango ka·rimskarang baksa Meghalaya-ona Assam gita gipin a·dokoniko matchu salpakbaenggipa trak garirangko champengjachina agan-golpogrikaniko daksamsona nanga ine janapaha.
Marwein-ni parakani gitade, Assam gita Meghalaya-ni dingtang dingtang matchu palbadingani biap ba bajalrang jekai, Baridua, Khanapara aro Ri Bhoi district gimikni Jirang matchu bajalrangona salbaenggipa trak garirangko maming dakeba champengsona nangjawa.
“Assam Cattle Preservation Bill 2021-ko Act-ona ra·bana skangba iani bidingo Assam sorkari baksa agan-golpogrikchengchina, chinga a·dok sorkariko mol·molatna nangnikenga,” ine Marwein uamangni jajrengsoanichi suko ong·gijako parakataha.
A·doko niam gri matchu cha·ue palbadingenggipako komiatna man·a gita, niamko ja·rike a·dokni pilak matchu palbadinggiparang sorkario biming segatani cholko ra·baoba nambegen ineba Marwein, a·dok sorkarina agan-ku·pattianirangkoba on·ataha.
Indake ong·engon, a·doko matchu palbadinggiparang bang·a neng·nikanirangko chagrongna nangengani gimin, ua State Prevention Cruelty of Animals Act-ko nipiltaianiko dakchina ineba sorkariko didiangjolaha.
