SHILLONG: Shillong songjinmani North Eastern Indira Gandhi Regional Institute of Health & Medical Sciences (NEIGRIHMS)-o rikenggipa Research Cancer Centre (RCC)-ko bakan matchotgnok aro ia centre-ko re·baenggipa 2021 bilsini February ba March jaode a·bachengna man·naba dongaha.
“Ia Research Cancer Centre-ko rikani kamrang da·o ta·rakengaha aro ia centre-na nangchongmotgipa bosturangko brena gitaba chinga approval-ko man·soaha,” ine NEIGRIHMS-ni Director P Bhattacharya parakataha.
Ia centre-o jakkalna nanggipa bosturangko December jaode chatna man·naba dongaha ineba Bhattacharya aganaha.
“Research Cancer Centre aro ia hospital nangrime kamko ka·na man·na gita hospital information management system-koba chatengaha. Ia centre-o electronic-chi record-rangko rakkigen aro sanna banna gita porikkarangkoba online gita ra·gen,” ine NEIGRIHMS-ni Director parakataha.
Dr Bhattacharya-ni parakatani gitade, ia centre-o kam ka·na sienggipa doctor-rang, nurse-rang aro administrative staff-ko mikkang bilsini February bon·angachibara ong·jaode March a·bachengachibara ra·gen.
“Uni gimin ia RCC-ko mikkang bilsini February ba March jaode chu·gimik a·bachengna gita chinga ka·dongenga,” ine NEIGRIHMS-ni Director parakataha.
Meghalaya a·doko cancer hospital-rang dongkujaengani a·sel cancer saenggipa manderang gipin a·dokrangonasa re·ange sanna bananirangko ra·na nangtokengachim.
“Mitam manderangde gipin biaprangona re·ange sanna bananirangko ra·kuainaba gnang indiba da·ode ia biapoba Cancer-ko sanna man·gnok,” ine Dr Bhattacharya parakataha.
Ia RCC-o ge 250 palangrang donggen ineba Dr Bhattacharya parakataha.